مجادعات شعرية بين ود البشرى وود المجزوب :كورتك يا عمر فاكيها من الواحة

مجادعات شعرية بين ود البشرى وود المجزوب :
Ahmed Bushra
كورتك يا عمر فاكيها من الواحة
يا عبداللطيف قونك عمل كتاحة
الود بشة جاب في الحضري قوون بالراااحة
إنضرب الوصيف والعرجا عاد لي مراحا
Ahmed Magzoub
كاريكا انطلق جهجه دفاعهم وجاطــو
و التالت وصل زاد للوصيف احباطــــــــو
المبدع نزار ..عذب فييرا وساطـــــــــــو
انتصر الهلال ...واحـــــزر تلاتة نقاطـــــو
Ahmed Bushra
المبدع نزار يا صحبي كورتو عجيبة
إتشفتن جدع لي فييرا (بيضة ) رهيبة
ود حامد خلاس بطل حقارتك سيبا
دي النجمة أم سنون بالغت في تعذيبا
Ahmed Magzoub
امـــبارح نزار ...للنجمة زاد اوجـــاعا
بيـــــــض لي علاء الدين بكل براعـــة
يقدل في الوسط..تحضير وفن و صناعة
تكتيك وانضباط مظبوط وزي الساعـة
Ahmed Bushra
شوف النجمة يا المجذوب وشوف حركاتا
تتفاحص تقول كل النقاط حقاتا
بعد النقة كلها ماخدة ليها تلاتة
أبعدي غادي ياخ ما تلاعبي الشفاتة
Ahmed Magzoub
امبارح نزار ..لفييرا زلق البيضــــــــــــــة
باكات الوصيف بالخلعة قـــــرشو قريضة
اقمــــــار الهلال ..يغمرنا دايما فــيــضـــا
و اعلامنا الزرق ...بشموخ تعانق البيضاء
Ahmed Magzoub
ههههههههههههههههههههههههههههههه دي حامضة
+++++++
افعال الهلال ..معــــــروفة ليست غامضة
واقمار الهلال في الحارة راكزة وصامــــدة
يا النجمة اللميضة الفي الدوام متلامضة
بيبالغ نزار ...والبيضة كانت حااااااااااامضة
Ahmed Bushra
وقالوا الكيشة قدمو ثم الحقو فوتو
نحن نقدم الفارة وعقب بنشوتو
الخواجة حيرناهو جطنا كروتو
والأهداف تلاتة تذكرك ليسوتو
Ahmed Magzoub
امبارح نزار جـــــاب لي فييــــــرا فلايت
اختفت النجوم في استادا عز الnight
الشئ الاكيد ...قون الوصيف اوف سايت
قون من غير طعم ...زي الملاح البايت
Ahmed Bushra
من خط الوسط كورة (عمر) ملعوبة
كورة عجيبة جات بالسنتي ليك محسوبة
باكات الوصيف وقفت تقول مصبوبة
خشت قوون جميل وإنبرشت الراكوبة
Ahmed Bushra
معروف الوصيف في إستادو يوت بترشة
من بشة الحريف طوالي ماخد تشة
جمهور الوصيف يا صحبي كيف يتعشى ؟
كل ما ينسى يتذكر لساتك الركشة
Ahmed Magzoub
من خط الوسط كورة عمــر مفكوكة
انكشف الدفاع ...يا حليل زمن كاسروكا
الحضري اندهش من شبكتو المدكوكة
قالو بعد وعي..قال ضربتو البازوكا
Ahmed Bushra
الخواجة راح ليهو الدرب في الموية
إتلون وشيهو الليلة كالحربوية
الحضري العجوز يحبى التقول بابوية
والسبب الأكيد صاروخ وماركتو (بويا )
Ahmed Magzoub
امبارح الهلال ضرب الذخيرة الحية
في العرضة الجنوب مرقت روايح الشية
اركز يا عـــــــــــــــــلاء خلي الامور النية
قلبوك ناس نزار والبيضة رايح و جيــــــة
Ahmed Bushra
أسلحة الدمار منعوها شان هدامة
شان بتهدد الأمن المعاهو سلامة
كيف يا بويا بتكسر كلام أوباما
هسة الحضري قال لي الوالي عاوز ماما
Ahmed Bushra
المبدع نزار متل العريس في السيرة
يقدل منطرب خلي الوصيف في حيرة
إتمايل يمين نامن عمل دويرة
زلق البيضة للزول اللي إسمو فييرا
Ahmed Magzoub
والود الشغيل في هلالنا الف حبابو
الحظ الســــعيد من المهازل جـــــابو
مرحب بالشغيل منو الجماعة يهابو
والعاجبو الشغيل يعلن معاي اعجابو
Ahmed Bushra
والولد الشغيل بصراحة نجم الليلة
صنديد الرجال الدخري شال الشيلة
إتحزم برز للنجمة قال يا ويلا
والنجمة إنتهت يا صحبي عاد يا حليلا
Ahmed Magzoub
الازرق زعـــــــــيم يا نجمة ليه بتعاندي
زي سينا البطل..الديمة هارش راندي
عاود وانتفض ما اهتما بي قون غاندي
في استادكم رقص صقرية عرضة وزاندي
Ahmed Bushra
والأزرق خطير كل الدول خابرنو
دا الفرق الكبار دايما بلاوزو منو
مريخك حمام يا النجمة ما حاسبنو
زي نادي النسور تلقينا يوت راشينو
Ahmed Magzoub
امبــــارح ضــــــحكتا ولما مرقو سنوني
يا ود بشري اخوي ..قون بويا هزا شجوني
المريخ عجيب ..واعلامو اسبيس توني
من زمن الدحيش والعوني والزنزوني
Ahmed Bushra
أمبارح ضحك في أكرم الرقاص
مبسوط بي الهدف فاكر الهلال إتماص
صاروخ بويا ذاد ليهو الوجع في الراس
وإنكسر المرق وإتشتت الرصاص
Ahmed Magzoub
مــــفروض الريال يـــشطب كرس وخضيرة
تشكيلتو القديمة اخير يسجل غيرا
في خط الهجوم كاريكا زافي السيرة
ود حامد نزار ...زي الفرنسي فييرا
Ahmed Bushra
قوون بشة العجيب والله ريح بالي
بي راسو الختير هد السديد العالي
إنضرب الوصيف وإتحققت آمالي
جوة القلعة عاد طارت حمامة الوالي
Ahmed Magzoub
امبارح نزار جـــــاب لي فييــــــرا فلايت
راوغو ماشي جاي ..left وكمان بال right
الحضري اتلبش فاكر كرونقو الشايــــــــت
بعد الشافو دا ..ظنيتو فايت فايت
Ahmed Bushra
كاريكا إنطلق بين الدفاع بي سهولة
عكس الكورة والباكات بقت مشلولة
غايتو الليلة يا المجذوب حقيقة بقولا
لسة الباشا تلميذ في السنين الأولى